Finna konur minna fyrir kreppunni ?

Er búinn að velta þessum málum fyrir mér í töluverðan tíma, eða allt frá því Glitnir var þjóðnýttur og bjöllurnar klingdu í hausnum á öllum landsmönnum. Síðan þá hafa stanslausar fréttir verið um aukna verðbólgu, hærri vexti, gjaldþrota fyrirtæki, hótanir evrópuþjóða gegn okkar litla landi. Ég hef tekið alvarlega þær fréttir (leiðbeiningar) þegar þekktir hagfræðingar og prófessorar hafa lýst því yfir í fréttatímum að nú verði að herða sultarólina, stíga varlega til jarðar þegar farið er í verslunarleiðangra o.s.frv.

Ég t.d. fór í búðina um daginn, og ætlaði mér að kaupa mér 4 ltr af kók m.a. og svo þegar kókið var komið ofan í körfuna blasti við mér tilboðsverð á Pepsi (ég hef svo sannarlega fylgt Coke-liðinu í keppnini Coke vs Pepsi síðan ég man eftir mér), nú voru einmitt góð ráð dýr, í staðinn fyrir að versla 2 ltr flöskuna af kók á rétt tæpar 200 krónur, var Pepsíið á 99 krónur. Ég minntist orða þessarra fræðimanna og skilaði þessu rándýra kóki og setti þess í stað kippu af Pepsi ofan í körfuna og spásseraði um verslunina fagnandi. Ég fann það þarna að ég hafði aldeilis minnkað rekstrarkostnað minnar fjölskyldu töluvert.

Svo þegar heim var komið, og eitthvað blandað hakk var komið á pönnuna byrjuðu fréttirnar. Ég settist niður og útskýrði fyrir frúnni minni hvað um væri að vera á íslandi, allir að segja það sama, að við íslendingar ættu nú að versla ódýrt í matinn og vera vel vakandi fyrir hverskyns tilboðum. Frúin virkaði mjög sannfærandi á mig og taldi ég hana vera 110% meðvitaða um þennan vanda sem steðjar nú að heimilum í landinu. Hún svona hristi hausinn yfir þessu ástandi og ég hugsaði með mér hvað við værum nú ofboðslega samrýmd og við færum leikandi í gegnum þessa kreppu sem allir tala svo mikið um.

Neinei..næsta frétt var um metaðsókn í fjölskylduhjálp kirkjunnar eða eitthvað álíka, þ.e. fólk kom saman og þáði ókeypis mat, við það tækifæri greip frúin upp einhvern IKEA-bækling og fór að innrétta bæði hjónaherbergið og barnaherbergið, og það sem var dýrast, það var sko best. Þannig að ég japlaði á þessu hræódýra blandaða hakki mínu um leið og ég svolgraði því niður með ódýra pepsíinu mínu.

Svo þegar ég versla inn (geri mér grein fyrir því reyndar að ég er eflaust ömurlega leiðinlegi eiginmaðurinn sem keyri kerruna á meðan frúin fleygir ofan í hana) þá reyni ég að sjálfsögðu að gera það með hagsýnina að leiðarljósi. En eins og fram kemur í sviganum, þá er það þannig þegar við förum saman, að þá einmitt held ég sveittum og stressuðum lófum utan um kerruna á meðan frúin fleygir hinum ýmsu hlutum ofan í. Hún t.d. þarf alltaf að kaupa dýrustu skinkuna, Búrfellsskinkuna, það er jafnmikið magn af skinku í þeim pakkningum og þeim sem ég versla en munurinn á pakkningunum er rúmlega 200 kall !

Svo neitar hún að borða lambasvið og slátur, sem allir vita að er herramansmatur. (tók reyndar neitun hennar á lambasviðunum til greina, eftir að ég vaknaði einn morguninn fyrr en hún (þetta var þegar við vorum svona að græja það og maður að reyna að vera sem fyndnastur og grennstur) og fór fram í frysti og náði tvo lambakjamma og víraði þá saman og skellti á koddann hennar og svo þegar hún vaknaði þá var hún í fyrsta skipti að sjá haus af lambi) En slátrið er t.d. mjög gott með hrísgrjónagraut.

Svo um helgina stendur til að fara á eyrina, og hvað á að gera þar, jú versla líkt og enginn verði morgundagurinn, það á að koma við í pólsku búðinni (sem ég vona að verði hætt starfsemi vegna erfiðra rekstrarskilyrða) og versla einhverjar kippur af Kubus og sennilega eina 10 poka af sýrðum gúrkum. 

Þetta var víti

Skil ekki þá sem gagnrýndu þennan vítaspyrnudóm. Af hverju var ekki rétt að dæma víti á þetta ? Ef einhver getur svarað mér því þá skal ég hugsa málið.

Gerrard stekkur upp í boltann, og er á undan varnarmanni Madrid í boltann sem fór utan í Gerrard og Gerrard féll í teignum. Ég skal viðurkenna það að við fyrstu sýn leit þetta ekki þannig út, en eftir að hafa séð endursýningar af atvikinu sannfærðist ég um að rétt var að dæma brot á þetta. Þetta segi ég þó svo að einhver United-maður í settinu hjá stöð2sport hafi verið ósammála dómaranum.

Annars hef ég áhyggjur að getuleysi ýmissa manna í liðinu, s.s. Aurelio, Agger, Kuyt, Lucas og Keane. (Er í besta falli tilbúinn að gefa Agger og Lucas sjens en aðrir á þessum lista mættu fara fljótlega frá Anfield án þess að ég myndi gráta mig í svefn)

Steven Gerrard: Þetta var vítaspyrna

Ekkert spes

Sá þennan leik Liverpool í gær, og ég var ekkert ofboðslega sannfærður.

Til að byrja með, þá er maður orðinn hálfruglaður varðandi Dirk Kuyt. Ég var hrifinn af honum áður en hann byrjaði að spila með liðinu, þegar fréttir bárust að því að hollenskur markaskorari, Dirk einmitt Kuyt að nafni hefði samið við Liverpool. Svo gerðist það mjög fljótlega að hrifningin varð að vonbrigðum, vegna þess hversu lélegur hann var, því hann var jú auðvitað keyptur fyrst og fremst til þess að skora mörk. Það er hægt að líkja þessu saman með Íraks-stríðinu, stríðið var réttlætt með gereyðingavopnaeign Saddams og var hugur í mörgum þess vegna að nú ætti aldeilis að sýna honum hvar David keypti ölið. Þannig horfi ég svipuðum augum á þessi Kuyt-kaup. Hann sumsagt var keyptur til þess að skora mörk en hefur lítið skorað, en af því að hann hleypur svo mikið, þá er það bara allt í lagi.

Svo eru líka leikmenn þarna á borð við Aurelio, Lucas (gef honum þó sjens) og Jamie nokkur Carragher. Nú nenni ég ekki að skrifa eitthvað um Aurelio og Lucas en staldra aðeins við og rökstyð gagnrýni mína á Carra.

Hann er auðvitað Liverpool-maður og það eitt virðist fría menn allri ábyrgð. Það er að sjálfsögðu jákvætt að hann skuli vera poolari en er það nóg ? Nei, hann er alltof mistækur og sýndi það sig t.d. í leiknum gegn Atletico Madrid um daginn, í jöfnunarmarki þeirra. Það er fyrst hægt að nefna arfaslaka knattspyrnutækni hjá honum og er t.a.m. Sami Hyypia miklu miklu miklu betri á boltann en Carra. Hann skilar boltanum stundum vel frá sér, en það gerir Hyypia mjög vel í 95% tilfella.

Það sem hægt er að segja um Carragher, svona jákvætt gæti verið þetta: Poolari - ósérhlífinn - leiðtogi - tæklari.

Svo kemur hár bolti fram völlinn og í átt að vítateig Liverpool þar sem Carragher horfir bara á boltann og spáir ekkert í því hvort hann hugsanlega geti skallað boltann til samherja, heldur er hann skallaður útaf og fyrir það fær hann klapp. Að öllum líkindum vegna þess að gott sé að koma boltanum úr leik og stilla upp. Svo sér maður Hyypia taka svipaða bolta annaðhvort á kassann og spilar honum til samherja, eða þá að hann skallar hann til samherja.

Það sem ég er í rauninni að meina, er að mér finnst mjög margir poolarar gleyma því að Jamie Carragher er bara sæmilegur enskur miðvörður, sem t.d. aldrei hefur átt kost á miðvarðastöðu í enska landsliðinu (sem hefur þó þessi síðari ár a.m.k. verið frekar lélegt). Mér finnst hann ekkert lélegur, en af þessum 4 eiginlegu miðvörðum sem Liverpool hefur úr að spila, þ.e. Hyypia - Carragher - Skrtel og Agger finnst mér Hyypia og Agger báðir betri fótboltamenn en Carragher, og er Skrtel endalaust að vaxa í liði Liverpool.

Benítez: Höldum okkur á jörðinni

Guðni ?

Framsókn mælist með 6,6% í þessari könnun. Ef að Guðni verður formaður þess flokks öllu lengur er næsta víst að fylgið verður í kringum þessa prósentutölu á næstunni. Guðni er nufninlega holdgervingur "gamla" framsóknarflokksins, flokksins sem uppfullur er af spillingu og allskyns óbjóði. Ef að Guðni vill flokknum sínum vel, hlýtur hann að stíga til hliðar og nýr forystumaður verði kynntur. Þar á ég ekki við Valgerði Sverrisdóttir, fyrrverandi bankamálaráðherra sem á sýnum tíma tók þátt í lofræðum um þessa svokölluðu útrás. Hver ætti þá að taka við keflinu sem formaður flokksins. Það hef ég ekki hugmynd um, en ljóst er, að með sömu forystusauðum í alþingispólitíkinni mun framsókn halda áfram að verða lítill flokkur, sem kenndur er við spillta forystumenn.

Það jákvæðasta við þessa könnun reyndar er að frjálslyndi flokkurinn næði ekki manni á þing.

Minnihluti styður stjórnina

"Frábær" kaup í Keane

Las viðtal við Keane í kvöld eftir leikinn, og þar útskýrði hann hvers vegna hann klúðraði dauðafæri í stöðunni 1-0 fyrir Liverpool. Vindurinn hefði þar sennilega haft sitt að segja. Þetta minnir mann ískyggilega á afsakanir Gerard Houllier þegar hann stjórnaði rauða hernum.

Þrátt fyrir að hafa skorað fyrir Liverpool í kvöld stend ég enn á því að þessi kaup eru slæm. Við höfum auðvitað Dirk Kuyt sem er frábær leikmaður. Hann er vanmetinn leikmaður sem hiklaust á að stilla upp sem striker ef að "El Nino" er ekki leikfær. Mér allavega hefur fundist stuðningsmenn Liverpool verið of gjarnir á að kenna Kuyt um allt sem aflaga fer í leik liðsins.......

Robbie Keane: Ánægður með stigið

Hvar eru göngin Möller ?

Hann var brattur með sig, frambjóðandinn Kristján Möller í aðdraganda síðustu alþingiskosninga. Hann gekk vasklega um götur og stræti húsavíkur og boðaði fagnaðarerindið. Framkvæmdir ættu að vera hafnar að göngum undir vaðlaheiði um næstu áramót (2007-8) og alls ekki nóg með það, heldur ættu þau að verða ferðalöngum gjaldfrjáls. Það var ekkert annað og maður uppveðraðist allur af þessum ummælum frambjóðandans.

Því næst var kosið og fékk samfylkingin í NA-kjördæmi rétt um 20% atkvæða og fóru því Einar Már og fyrrnefndur Kristján Lúðvík Möller inn á þing. Svo tóku við vangaveltur um það hverjir það yrðu, sem mynduðu ríkisstjórn og hvað gerðist, sjallarnir og samfylkingin, turnarnir tveir mynduðu með sér stjórnarsamstarf. Svo gerðist það einnig að Möller fékk ráðherrastól í hinni nýju ríkisstjórn. Hann fékk samgönguráðuneytið.

Ég fer nú býsna oft inn á akureyri og hef ekki ennþá séð svo mikið sem stunguspaða í kringum vaðlaheiðina og þvi spurning hvort Kristján Möller hafi nokkuð búist við því fyrirfram að fá ráðherrastól, og þaðan af síður samgönuráðuneytið.

Bílar teppa Víkurskarð

Margir unnið þrekvirki !

Nú hafa stjórnarmálamenn, og þá sérstaklega hæstvirtir forsætis- og viðskiptaráðherrar tönglast á þessu undanfarið, hversu rosalegt þrekvirki menn hafa unnið síðustu daga ! Þeir hafa látið í það skína að sá árangur undafarinna daga hjá mörgu fólki (þeir eiga að sjálfsögðu við enga aðra en sjálfa sig fyrst og fremst) hafi varla verið í mannlegu valdi að kljást við en hindranirnar hafa þyrplast upp um leið og þeir hafi átt við þær.

Hvar eru þessi þrekvirki ?

Er það þrekvirki að ekki virðist takast að sannfæra rússa um lán ?

Eða gæti það verið þrekvirki að heimurinn tekur íslensku krónuna ekki gilda ?

Hvaða ofsalega flotta þrekvirki er þetta sem þessir blessuðu menn tönglast á endalsaust ?

Ég er farinn að kaupa mér núðlur.

Vanskil af samúræjabréfum

Kominn með leið á þessu

endalausa skæli í manninum um dómgæslu !

Því miður er þetta leiðinlegt, þegar þjálfarar keppast við það leiki eftir leiki að axla enga ábyrgð á liðum sínum og hvert er þá þægilegast að snúa sér, jú að dómurum.

Það er bara svo déskoti leiðinlegt að þurfa alltaf að heyra eða lesa sömu tugguna frá sömu aðilunum. Þessi fyrirsögn á fréttinni kemur t.d. jafn mikið á óvart og að á morgun sé föstudagur (fimmtudagur í dag). 

Það er hinsvegar kristaltært að þessir sömu aðilar sem skæla hvað mest út af dómgæslu muni gera það aftur, og það er einnig kristaltært að sambandið (HSÍ) mun ekkert gera með þessi ummæli.

Ég veit það vel að dómarar geta átt misjafna leiki, líkt og leikmennirnir og liðin en sem fyrr segir, sama leiðindavælið í sömu mönnunum er einstaklega pirrandi.

Viggó Sigurðsson: Annar dómarinn var á móti okkur

Þessir síðustu og verstu

Við feðginin vorum svo ólýsanlega heppin í dag, að geta fylgst með umræðum frá alþingi. Við sátum spennt yfir umræðunum og veltum því fyrir okkur hverjir væru nú mest sannfærandi.

Niðurstaðan var svo sú að enginn af þeim stjórnmálamönnum sem þar talaði sannfærði okkur og komumst við að því að allir sem einn, tala í frösum og svona "hvernig get ég sannfært nautheimskan almúgan þarna úti" tali.

Svo skil ég ekki af hverju Jóhanna Sigurðardóttir er svona ofboðslega rosalega æðislega vinsæll ráðherra. Getur það verið vegna þess að hún er gömul kona með hvítt hár og talar eins og hún sé grátandi ?

Vinnuumhverfi Geirs Hilmars Haarde getur varla talist öfundsvert. Hann elskar Davíð. Samfylkingin elskar Davíð ekki og formaður, varaformaður og aðrir ráðherrar og þingmenn samfylkingarinnar vilja sjá Davíð burt úr stóli formanns bankastjórnar seðlabankans. Ég ætla að spá því að stjórnin springi kringum jólin.

Ég eldaði viðbjóðslega vonda gúllassúpu í kvöld, annað heimilisfólk creditaði mig hinsvegar fyrir frábæran kvöldverð. Ég steikti lauk og epli á pönnu og steikti nautagúllas sem ég kryddaði með öllu þessu drasli, timían og pipar og öllu dæminu í þeim geira. Blandaði svo öllu saman í pott og leyfði þessu að malla í 40mín. Niðurstaðan var bragðlaust, seigt kjöt sem við borðuðum í kvöld en þrátt fyrir það hversu "frábært" þetta var, skv því sem ég heyrði, vildi enginn ábót, það var nóg til að þessu gúllasi. Þetta er akkúrat sem ég þoli illa, þegar ég veit að ég t.d. þarna eldaði vont gúllas en mér er sagt að það hafi verið gott. Ef hinsvegar einhver hefði sagt við mig að það væri vont, hefði ég að öllum líkindum farið að gráta, þannig að hreinskilið svar þarna hefði svosem ekkert kætt mig.

Er farinn í koju og bið ykkur ákaflega vel að lifa....já svo eru komnar myndir úr villsvínaveiðum okkar gauja í sumar inn í myndaalbúmið.

Góður í manager

Ég á erfitt með að lýsa því hversu spenntur ég yrði ef að Fernando Cavenaghi kæmi til Liverpool !

Þessi strákur brilleraði í leik eftir leik hjá mér, þegar ég stundaði knattspyrnuleikina Championship Manager og Football Manager sem mest. Tímaleysi undanfarin ár hefur dregið úr spilamennsku minni.

Gæti einnig trúað því að þetta sé svar Benitez við markaþurrð Robbie Keane enda hefur hann engan veginn staðið undir þeim væntingum sem til hans voru gerðar. (nenni ekki núna að hlusta á það að hann sé bara ofboðslega duglegur eins og Kuyt)

 

Liverpool með Cavenaghi í sigtinu